Sinisiyasat ng Canada ang mga alegasyon na sangkot ang India sa pagpatay sa isang aktibistang Sikh, isang mamamayan ng Canada, sa lupain ng Canada.
Ang biktima, ang pinuno ng Sikh na si Hardeep Singh Nijjar, ay binaril sa labas ng isang sentrong pangkultura ng Sikh sa Surrey, British Columbia noong Hunyo 18.
Malakas na tagasuporta si Nijjar ng isang independiyenteng tahanan ng Sikh na kilala bilang Khalistan. Ipinagbabawal ang kilusan sa India dahil tingin ng mga opisyal na ito ay banta sa seguridad ng bansa. Ngunit may suporta pa rin ang kilusan sa mga bansa tulad ng Canada at United Kingdom, kung saan may malalaking komunidad ng Sikh.
Sinabi ni Prime Minister Justin Trudeau sinisiyasat ng mga ahensiyang pang-intelihensiya ng Canada ang mga alegasyon na maaaring may papel ang pamahalaan ng Punong Ministro ng India na si Narendra Modi sa pagpatay kay Nijjar.
Sinabi ni Trudeau sa Parlamento noong Lunes na napag-usapan niya ang bagay na ito kay Modi noong nakaraang linggo sa G-20. Sinabi niya kay Modi na hindi maaaring tanggapin ang anumang pakikialam at humingi siya ng kooperasyon sa imbestigasyon.
“Ang anumang pakikialam ng isang dayuhang pamahalaan sa pagpatay ng isang mamamayan ng Canada sa lupain ng Canada ay isang hindi matatanggap na paglabag sa ating soberanya,” sabi ni Trudeau.
Sinabi ni Canadian Foreign Minister Mélanie Joly na pinaalis ang pinuno ng intelihensiya ng India sa Canada bilang kahihinatnan.
Sinabi ni Public Safety Minister Dominic LeBlanc na naglakbay sa India ang tagapayo sa seguridad ng bansa ng Canada at ang pinuno ng serbisyo ng espiya ng Canada upang makipagkita sa kanilang mga katapat at harapin ang mga ahensiya ng intelihensiya ng India sa mga alegasyon.
Sinabi ni pinuno ng oposisyon na si Pierre Poilievre na kung totoo ang mga alegasyon, kumakatawan ito sa “isang malaking paglapastangan sa ating soberanya.”
“Nararapat na maprotektahan ang mga Canadian sa lupain ng Canada. Hinahamon namin ang pamahalaan ng India na kumilos nang may katapatan habang iniimbestigahan ng mga awtoridad ang pagpatay na ito, dahil dapat lumabas ang katotohanan,” sabi ni Poilievre.
Tinawag na kakila-kilabot at nakakagulat ng pinuno ng oposisyon na si Jagmeet Singh, na siyang Sikh, ang insidente.
“Sa lahat ng mga Canadian, ito ang aking panata,” sabi ni Singh. “Hindi ako titigil sa paghahanap ng katarungan, kabilang ang pananagutin si Narendra Modi.”
Hindi agad tumugon ang Embahada ng India sa Ottawa sa kahilingan para sa komento ng Digital tungkol sa bagay na ito.